شباب جامعة
من طرف 
تعرفوا اني حبيب قديم
ههههههه
بتكلم جد والله
اول حب ليا كان عندي 4 سنين
كنت ساعتها في الحضانه
حبيت بنت الجيران
بس هي كانت اكبر مني شويه
كان عندها 23 سنه
هههههههههههه حب بقي
كنت بروح عندهم البيت وافضل باصص ليها
كنت بفضل فاتح عيني و حابس نفسي عشان ماتفوتنيش لحظه واحده من غير ما اشوفها
مش عارف ازاي ولد صغير يحس الاحساس ده
بس فعلا كنت بحبها .. بغير عليها .. كل الاحاسيس اللي اي حد بيحس بيها لما يحب حد بجد
المهم المفاجاه الكبيره بقي
والله انا راجل دوغري من يومي
تعرفو عملت ايه
روحت عشان اخطبها
xD xD والمصحف ده اللي حصل
كنت محوش 15 قرش
و استلفت من جدو 10 قرش
وروحت جبتلها خاتم صفيح
كنت فرحان بيه اوي
و كنت مستني تعبيرات وشها لما تشوف الخاتم و تعرف اني جي اخطبها
المهم
روحت و لبست اشيك حاجه عندي
روحتلها بفنله حمالات لسه جايبها من علي الحبل ههههههه عقليه طفل بقي
و لبست جزمه جدو عشان يبقي عليا القيمه
وروحتلها
فتحتلي امها ( حماتي ) 0
قولتلها فين ساره
قالتلي ساره كده حاف يا واد .. وايه اللي معاك ده
قولتلي فجاه
ههههه ماشي هي جوه مع عمو حاتم هدخل اناديهالك
وجت ساره
ازيك يا ساره
كويسه يا يويو ايه الشياكه دي كلها ..
انا جبت الخاتم ده ليكي
ليا انا
اه جبته ليكي انتي .. كنت من زمان نفسي اجبلك حاجه فحوشت من مصروفي و جبتلك الخاتم ده يارب يعجبك
ميرسي يا يويو بس ده صغير عليا
صغير ؟ بس ده جه علي قد صبعي يبقي ازاي صغير عليكي
ههههههه ماهو يا يويو انا ايدي اكبر من ايدك
معلش مكنش قصدي المره اللي جايه هحوش فلوس اكتر و اجيبلك خاتم كبير خالص قد الدنيا
ربنا
يخليك يا يويو .. ان شاء الله اول ما اخلف و اجيب ولد ان شاء الله هسميه
يحيي ويارب يكون عسل زيك كده .. انا خلاص فاضلي 4 شهور اهو واولد
يعني ايه تولدي؟
يعني فاضلي شهر و شهر و شهر و شهر و اجيب نونو عسل زي كده
عمو حاتم بيقول لو ولد هيسميه يوسف بس انا هقنعه انه يسميه يحيي
وهو ماله انتي هتبقي ام النونو
ما هو برضو يا يويو ابو النونو ولازم يكون ليه رايه برضو
ابوه ؟
اه ما عمو حاتم يبقي جوزي
اهو عمو حاتم جه اهو روح سلم عليه يا يويو
عارفين شعوري ساعتها كان ايهو انا بسلم عليه
كانت اول حب ليا و اتصدمت الصدمه دي
اما بالنسبه للخاتم لبسته البنوته اللي خلفتها ساره
واللي مرت بينا السنين و عشت معاها قصه حب تانيه
هههه ما تستغربوش هبقي احكيلكم القصه دي بعدين
