شباب جامعة
من طرف 
في ساعة متأخرة من الليل أتطلع للسماء و اراقب الامطار المتساقطه
ابتسمت و قولت " اللهم صيبا نافعا "
..الآن رب السموات والأرض في السماء الدنيا ينتظر توبة نادم أو دعاء مسلم
..من كتر ما انا مكسوف منك.. خايف أول ما تعرف اني أنا اللي
بتـكلم ترفض تسمعني
..يارب.. أنا عارف ان ذنوبي كتيره
بس اغفر.. هو انا ليا مين غيرك يغفر؟
..اغفرلي بلحظة قولت فيها لا إله إلا الله قاصد كل حرف
..بركعتين صليتهم علشان واحشني الكلام معاك.. بدمعة دمعتها ف مرة وانا بدعيلك
..بابتسامة رضا على شفايف والدي
..بدعوة دعيتهالي ست عجوزة ما اعرفهاش بعد ما عديتها الشارع
..بيوم وقفت فيه في القطار لراجل تعبان.. بشوية ميا سقيتهم لطفل واقف في الشارع حران
..براحة اتـنين كانوا متخاصمين وانا صالحتهم..
بيوم صومته ليك يارب من غير ماحد ياخد باله
بأي حاجة.. بس اغفر.. هو انا ليا مين غيرك يغفر؟
..عارف ان تقصيري في حقك زاد حده
..واليوم اللي اصلي فيه السـُـنة بعد الفرض ضميري بحس ان محدش مرتاح قده
فاغفرلي.. هو انا ليا مين غيرك يغفر؟؟
..يارب انا حامدك وشاكرك على كل وأي حاجة صغيرة وكبيرة قدرتلي تبقى في حياتي
وحش حلو صعب جميل خنيق ودمه تقيل.. كله الحمد لله
الحمد لله على كل نعمة وكل ضحكه وكل خروجة .. الحمد لله
الحمد لله على صحابي .. وعن كليتي اللي كنت بتمناها .. وعلى أي فلوس خليتني أنساها
في جيب جاكيت الشتا ولقيتها ف وقت زنقة.. الحمد لله
الحمد لله على ايد بتعرف ترسم.. و دماغ بتعرف تفكر .. على قلب بيعرف يحب من غير غش ..
..و على روح بتحب تخدم اللي حواليها
الحمد لله على قلب بـيدق لما يسمع اسمك.. و رجل عاملة حساب انها هتمشي على صراطك
وعلى لسان ما بينساش يقول الحمد لله.. الحمد لله
يارب انا عارف ان الدنيا وخداني.. وحلم المستقبل مالي قلبي ودماغي
بس يارب نفسي افرح بابا أوي.. بقالي كتير ما فرحتوش.. بقاله مدة ماحضنيش وهو فخور
بـيا.. زعلان من ابنه اللي واخد الحياة دلع.. نفسي في يوم يرفع راسه ويبص للتلفزيون و يقول لصحابه الواد ده ابني
..وصحابه يقولوا : يازين ما خـلـّـفت
يارب.. اكتبلي النجاح والستر والرضا والهداية
اكتبلي نهاية تكون في العشر الأواخرمن شهر رمضان
اكتبلي قبر منور.. وزيارة لبيتك الحرام
اكتبلي بنت الحلال اللي اقدر اعاملها بمايرضيك و الذريه الصالحه اللي تكبر و تقدر تخدم بلدي و ديني
يـــــــــــــارب
عدل سابقا من قبل TANTAWY في الإثنين مارس 08, 2010 4:41 pm عدل 1 مرات
